အိန္ဒိယသမ္မတနိုင်ငံ ဝန်ကြီးချုပ် ဒေါက်တာမန်မိုဟန်ဆင်း၏ ပြည်ထောင်စုသမ္မတမြန်မာနိုင်ငံတော် ခရီးစဉ်အတွင်း ထုတ်ပြန်သည့် မြန်မာ-အိန္ဒိယ နှစ်နိုင်ငံ ပူးတွဲကြေညာချက်

 Unicode ေျပာင္းပါ

အိန္ဒိယသမ္မတနိုင်ငံ ဝန်ကြီးချုပ် ဒေါက်တာမန်မိုဟန်ဆင်း၏

 ပြည်ထောင်စုသမ္မတမြန်မာနိုင်ငံတော် ခရီးစဉ်အတွင်း ထုတ်ပြန်သည့်

မြန်မာ-အိန္ဒိယ နှစ်နိုင်ငံ ပူးတွဲကြေညာချက်

၁။        ပြည်ထောင်စုသမ္မတမြန်မာနိုင်ငံတော်၊ နိုင်ငံတော်သမ္မတ ဦးသိန်းစိန်၏ ဖိတ်ကြားချက်အရ အိန္ဒိယ သမ္မတနိုင်ငံ ဝန်ကြီးချုပ် ဒေါက်တာမန်မိုဟန်ဆင်း သည် ၂၀၁၂ ခုနှစ်၊ မေလ ၂၇ ရက်နေ့မှ ၂၉ ရက်နေ့အထိ မြန်မာနိုင်ငံသို့ တရားဝင် ချစ်ကြည်ရေးခရီး လာရောက်လျက်ရှိသည်။ အိန္ဒိယဝန်ကြီးချုပ်နှင့်အတူ ဇနီး ရှရီမာတီ ဂူရှာရန်ခါ လည်း အတူ လိုက်ပါခဲ့သည်။
၂။         အိန္ဒိယဝန်ကြီးချုပ်အား ပြည်ထောင်စုသမ္မတမြန်မာနိုင်ငံတော်၊ နိုင်ငံတော်သမ္မတမှ နေပြည်တော်၌ ဂုဏ်ပြုအခမ်းအနားဖြင့် ကြိုဆိုခဲ့ပြီး၊ ဂုဏ်ပြုညစာစားပွဲဖြင့် တည်ခင်းဧည့်ခံခဲ့သည်။
၃။        အိန္ဒိယဝန်ကြီးချုပ်၏ ယခုချစ်ကြည်ရေးခရီးစဉ်သည် နှစ်ပေါင်း (၂၅) နှစ်အတွင်း အိန္ဒိယဝန်ကြီးချုပ် တစ်ဦး၏ ပထမဦးဆုံး မြန်မာနိုင်ငံ ခရီးစဉ်ဖြစ်ပြီး၊ မြန်မာ-အိန္ဒိယ နှစ်နိုင်ငံ ဆက်ဆံရေး၏ သမိုင်းဝင် ချစ်ကြည်ရေးခရီး ဖြစ်သည်။
၄။        နှစ်နိုင်ငံခေါင်းဆောင်များသည် နှစ်ဦးချင်း သီးခြားတွေ့ဆုံခဲ့ပြီးနောက်၊ နှစ်ဘက် ကိုယ်စားလှယ်များ ပါဝင်သည့် နှစ်နိုင်ငံ တရားဝင်တွေ့ဆုံဆွေးနွေးပွဲကို ဆက်လက်ကျင်းပကာ နှစ်နိုင်ငံ၊ ဒေသတွင်းနှင့် နိုင်ငံတကာ ရေးရာ အကျိုးတူကိစ္စရပ်များအပေါ် အမြင်ချင်းဖလှယ် ဆွေးနွေးခဲ့ကြသည်။ တွေ့ဆုံဆွေးနွေးမှုများကို မြန်မာ-အိန္ဒိယ အိမ်နီးချင်း နှစ်နိုင်ငံနှင့် ပြည်သူများအကြား ရှိရင်းစွဲ ချစ်ကြည်ရင်းနှီးသော ဆက်ဆံရေးကို ထပ်ဟပ်ပေါ်လွင်စေလျက် အပြန် အလှန် နွေးထွေးရင်းနှီးစွာ အပြုသဘောဆောင် ဆွေးနွေးခဲ့ကြသည်။
၅။        နှစ်နိုင်ငံ တရားဝင် တွေ့ဆုံဆွေးနွေးပွဲသို့ အိန္ဒိယနိုင်ငံဘက်မှ အိန္ဒိယဝန်ကြီးချုပ် ဒေါက်တာ မန်မိုဟန်ဆင်းနှင့်အတူ ပြည်ပရေးရာဝန်ကြီး ရှရီအက်စ်အမ်ကရစ်ရှနာ၊ အမျိုးသား လုံခြုံရေးအကြံပေး ရှရီအက်စ်မီနွန်၊ ဝန်ကြီးချုပ်၏အတွင်းဝန် ရှရီပူလော့ချက်တာဂျီ၊ နိုင်ငံခြားရေးအတွင်းဝန် ရှရီရန်ဂျန်မထိုင်း၊ မြန်မာနိုင်ငံဆိုင်ရာ အိန္ဒိယသံအမတ်ကြီး ဒေါက်တာ ဗီလာဆန်ဒါရာရာဂျန်ရှရှေဒရီနှင့် အဆင့်မြင့် အစိုးရ အရာရှိကြီးများ ပါဝင်တက်ရောက်ခဲ့ကြသည်။
၆။        မြန်မာနိုင်ငံဘက်မှ နိုင်ငံတော်သမ္မတ ဦးသိန်းစိန်နှင့်အတူ နိုင်ငံခြားရေးဝန်ကြီးဌာန၊ ပြည်ထောင်စု ဝန်ကြီး ဦးဝဏ္ဏမောင်လွင်နှင့် အခြား ပြည်ထောင်စုဝန်ကြီးများ၊ အိန္ဒိယနိုင်ငံဆိုင်ရာ မြန်မာသံအမတ်ကြီး ဦးဇင်ယော် နှင့် အဆင့်မြင့်အစိုးရအရာရှိကြီးများ ပါဝင်တက်ရောက် ခဲ့ကြသည်။
၇။          နိုင်ငံတော်သမ္မတ နှင့် အိန္ဒိယဝန်ကြီးချုပ် တို့သည် နှစ်နိုင်ငံ ကဏ္ဍစုံပူးပေါင်း ဆောင်ရွက်မှုများနှင့် နိုင်ငံတော်သမ္မတ ဦးသိန်းစိန်၏ ၂၀၁၁ ခုနှစ်၊ အောက်တိုဘာလအတွင်း အိန္ဒိယနိုင်ငံသို့ သွားရောက်ခဲ့သည့် အထူးအောင်မြင်သော တရားဝင် ချစ်ကြည်ရေးခရီးစဉ် နောက်ပိုင်း နှစ်နိုင်ငံအကြား ဖြစ်ပေါ်တိုးတက်မှုများကို ကျယ်ကျယ်ပြန့်ပြန့် လေ့လာသုံးသပ်ခဲ့ သည်။ နှစ်ဘက်စလုံးမှ ဖြစ်ထွန်းပေါ်ပေါက်လျက်ရှိသည့် နှစ်နိုင်ငံအကြား တရားဝင် အလည်အပတ်ခရီးစဉ်များ၊ တိုးတက်လာသည့် စီးပွားရေး၊ ကုန်သွယ်ရေး နှင့် ယဉ်ကျေးမှု ပူးပေါင်း ဆောင်ရွက်မှုများ နှင့် ပြည်သူများအချင်းချင်း ထိတွေ့ဆက်ဆံနေမှုများ အပေါ်တွင် နှစ်နိုင်ငံ ခေါင်းဆောင်များက ကျေနပ်အားရမှုရှိကြောင်း ထုတ်ဖော်ပြောကြားခဲ့သည်။
၈။        နှစ်နိုင်ငံ ခေါင်းဆောင်များသည်  နှစ်နိုင်ငံချင်း၊ ဒေသတွင်းနှင့် ကမ္ဘာ့ရေးရာများ၌ နှစ်နိုင်ငံ အကျိုးစီးပွားအတွက် အနာဂတ်တွင် ပူးပေါင်းဆောင်ရွက်သွားမည့် လုပ်ငန်းစဉ်အပေါ် သဘောတူညီခဲ့ကြသည်။ နှစ်နိုင်ငံအကြား နှစ်ဦးနှစ်ဘက် အကျိုးရှိစေမည့် ပူးပေါင်းဆောင်ရွက်မှုများဖြစ်သည့် နယ်စပ်ဒေသ ဖွံ့ဖြိုးတိုးတက်ရေး၊ ပို့ဆောင်ရေး၊ ထိတွေ့ဆက်ဆံရေး၊ လယ်ယာ စိုက်ပျိုးရေး၊  ကုန်သွယ်ရေးနှင့် ရင်းနှီးမြှုပ်နှံရေး၊ အပြန်အလှန် ချစ်ကြည်ရေး အစီအစဉ်များ တိုးမြှင့်ပြုလုပ်ရေး နှင့် လူ့စွမ်းအားအရင်းအမြစ် ဖွံ့ဖြိုးတိုးတက်ရေး စသည့် ကဏ္ဍများတွင် ပူးပေါင်းလုပ်ဆောင်သွားရန် သဘောတူညီခဲ့ကြသည်။ ထို့အပြင်သက်ဆိုင်ရာနိုင်ငံများမှ ပြည်သူများ သာယာဝပြောရေး နှင့် ဖွံ့ဖြိုးတိုးတက်ရေးအတွက် ဒေသတွင်း တည်ငြိမ်အေးချမ်းမှုရှိရန် လိုအပ်ကြောင်း အသိအမှတ်ပြုခဲ့ကြသည်။ ယင်းကိစ္စနှင့်စပ်လျဉ်း၍ မြန်မာ-အိန္ဒိယ နှစ်နိုင်ငံ အကြား နီးကပ်စွာ ပူးပေါင်းဆောင်ရွက်မှုသည် အရေးပါကြောင်း နှင့် နှစ်နိုင်ငံ ပြည်သူများ အကျိုးအတွက် နှစ်နိုင်ငံ၏ အရင်းအမြစ်များကို ထိရောက်စွာ အတူတကွ ပူးပေါင်း အသုံးပြုသွားရန် လိုအပ်ကြောင်း နှစ်နိုင်ငံခေါင်းဆောင်များက အလေးထား ပြောကြားခဲ့သည်။
၉။        အိန္ဒိယဝန်ကြီးချုပ်က မြန်မာအစိုးရ၏ ဒီမိုကရေစီ နှင့် အမျိုးသားစည်းလုံး ညီညွှတ်ရေး နှင့်ပတ်သက်၍ ထင်ရှားသော ပြုပြင်ပြောင်းလဲမှု လုပ်ငန်းစဉ်များ ဆောင်ရွက်နေမှုများနှင့်ပတ်သက်၍  နိုင်ငံတော်သမ္မတအား ချီးကျူးဂုဏ်ယူကြောင်း ပြောကြားခဲ့သည်။ မြန်မာအစိုးရအနေဖြင့် တိုင်းရင်းသားအဖွဲ့များနှင့် ငြိမ်းချမ်းရေး ဆွေးနွေးမှုများ စတင်ဆောင်ရွက်နေခြင်း၊ ဒေါ်အောင်ဆန်းစုကြည် ခေါင်းဆောင်သော အမျိုးသား ဒီမိုကရေစီအဖွဲ့ချုပ် အပါအဝင် နိုင်ငံရေးပါတီများနှင့် တွေ့ဆုံဆွေးနွေးခြင်း စသော မြန်မာနိုင်ငံ၌ ဖြစ်ပေါ်လျက် ရှိသည့် နိုင်ငံရေး၊ စီးပွားရေးနှင့် လူမှုရေး ပြုပြင်ပြောင်းလဲမှုများအပေါ် အိန္ဒိယဝန်ကြီးချုပ်က ချီးကျူး ပြောကြားခဲ့သည်။ မြန်မာနိုင်ငံ၌ မကြာသေးမီက ကြားဖြတ်ရွေးကောက်ပွဲများကို လွတ်လပ်၊ တရားမျှတပြီး ငြိမ်းချမ်းစွာ ကျင်းပပေးနိုင်ခဲ့သည့်အတွက်လည်း ဝမ်းမြောက်ဂုဏ်ယူကြောင်း ထုတ်ဖော် ပြောကြားခဲ့သည်။
၁၀။      အိန္ဒိယဝန်ကြီးချုပ်မှ  မြန်မာနိုင်ငံ ဒီမိုကရေစီပြုပြင်‌ ပြောင်းလဲရေး လုပ်ငန်းစဉ်များ တိုးမြှင့် ဆောင်ရွက်နိုင်စေရန်နှင့် ဒီမိုကရေစီ အဖွဲ့အစည်းများဖြစ်သည့် လွှတ်တော်၊ အမျိုးသား လူ့အခွင့်အရေးကော်မရှင် နှင့် သတင်းမီဒီယာ အဖွဲ့အစည်းများ စွမ်းဆောင်ရည် တိုးတက်စေရန် အတွက် အိန္ဒိယဘက်မှ လိုအပ်သည့် ကူညီထောက်ပံမှုများ ပေးအပ်သွားလိုကြောင်း ထပ်လောင်း ပြောကြားခဲ့သည်။ ပြည်သူ့လွှတ်တော် ဥက္ကဌ သူရဦးရွှေမန်း ခေါင်းဆောင်သော  မြန်မာနိုင်ငံ လွှတ်တော်ကိုယ်စားလှယ်အဖွဲ့၏ ၂၀၁၁ ခုနှစ်၊ ဒီဇင်ဘာ အတွင်းက အိန္ဒိယနိုင်ငံသို့ လာရောက်ခဲ့သည့် အောင်မြင်သော ခရီးစဉ်ကို ပြန်‌ပြောင်းသတိရလျက်၊ အိန္ဒိယဝန်ကြီးချုပ်မှ မြန်မာ့ လွတ်တော်ကိုယ်စားလှယ်များ နှင့် ဝန်ထမ်းများအတွက် အိန္ဒိယနိုင်ငံမှ သင်တန်းများ ပေးအပ် သွားလိုကြောင်း ကမ်းလှမ်းပြောကြားခဲ့သည်။
၁၁။      အိန္ဒိယဝန်ကြီးချုပ်၏ မြန်မာနိုင်ငံ ခရီးစဉ်အတွင်း နှစ်နိုင်ငံ ပူးပေါင်းဆောင်ရွက်မှု မြှင့်တင်ရေးအတွက် အောက်ဖော်ပြပါ နားလည်မှုစာချွန်လွှာ/သဘောတူညီချက်များကို နှစ်ဘက် လက်မှတ်ရေးထိုးခဲ့ကြသည်-

(၁)       အိန္ဒိယအစိုးရမှ ပေးအပ်မည့် သက်သာသောချေးငွေ အမေရိကန်ဒေါ်လာ သန်း (၅၀၀) နှင့်ပတ်သက်သည့် နားလည်မှုစာချွန်လွှာ

                            (၂)       မြန်မာ-အိန္ဒိယ နှစ်နိုင်ငံအကြား လေကြောင်းဝန်ဆောင်မှုဆိုင်ရာ သဘော တူညီချက်

               㷺=]K       (၃)       မြန်မာ-အိန္ဒိယ နယ်စပ်ဒေသများ ဖွံ့ဖြိုးတိုးတက်ရေးဆိုင်ရာ နားလည်မှု စာချွန်လွှာ

(၄)       မြန်မာ-အိန္ဒိယ နှစ်နိုင်ငံအကြား ပူးတွဲကုန်သွယ်ရေး နှင့် ရင်းနှီးမြှုပ်နှံမှု  ဖိုရမ် တည်ထောင်ရေးဆိုင်ရာ နားလည်မှုစာချွန်လွှာ

(၅)       စိုက်ပျိုးရေးသုတေသန နှင့် ပညာရေးအဆင့်မြင့်ဌာန တည်ထောင်ရေး ဆိုင်ရာ နားလည်မှု စာချွန်လွှာ

(၆)       နေပြည်တော်၊ စိုက်ပျိုးရေးသုတေသနဦးစီးဌာန၌ ခေတ်မီပညာပေး စပါး ဇီဝဥယျာဉ် တည်ထောင်ရေးဆိုင်ရာ နားလည်မှုစာချွန်လွှာ

(၇)       မြန်မာနိုင်ငံ သတင်းအချက်အလက် နှင့် နည်းပညာဌာန တည်ထောင်ရေး ဆိုင်ရာ နားလည်မှုစာချွန်လွှာ

(၈)       ဒဂုံတက္ကသိုလ် နှင့် ကော်လ်ကတ္တားတက္ကသိုလ် တို့အကြား ပူးပေါင်း ဆောင်ရွက်ရေး နားလည်မှုစာချွန်လွှာ

(၉)       မြန်မာနိုင်ငံမဟာဗျူဟာ နှင့် နိုင်ငံတကာလေ့လာရေးဌာန (MISIS) နှင့် နယူးဒေလီရှိ (The Indian Council of World Affairs - ICWA) တို့အကြား ပူးပေါင်းဆောင်ရွက်ရေး နားလည်မှုစာချွန်လွှာ

(၁၀)    မြန်မာနိုင်ငံ မဟာဗျူဟာ နှင့် နိုင်ငံတကာလေ့လာရေးဌာန (MISIS) နှင့် နယူးဒေလီရှိ (Institute for Defence Studies and Analyses - IDSA) တို့အကြား ပူးပေါင်းဆောင်ရွက်ရေး သဘောတူညီချက်

                            (၁၁)     မြန်မာ-အိန္ဒိယ နှစ်နိုင်ငံအကြား ယဉ်ကျေးမှုဖလှယ်ရေး အစီအစဉ်(၂၀၁၂- ၂၀၁၅)

                             (၁၂)     မြန်မာ-အိန္ဒိယ နှစ်နိုင်ငံ နယ်စပ်၌ နယ်စပ်စျေးများ ဖွင့်လှစ်ရေးဆိုင်ရာ  နားလည်မှုစာချွန်လွှာ

၁၂။      နှစ်နိုင်ငံ ခေါင်းဆောင်များက မြန်မာ-အိန္ဒိယ နှစ်နိုင်ငံဆက်ဆံရေးသည် တူညီသော သမိုင်းကြောင်း၊ ပထဝီ အနေအထား၊ ယဉ်ကျေးမှု နှင့် ဖွံ့ဖြိုးတိုးတက်မှု အပေါ်တွင် အခြေခံကြောင်း အသိအမှတ်ပြုခဲ့ကြသည်။ မြန်မာနိုင်ငံ၏ ပြုပြင်ပြောင်းလဲမှုအရ ၂၀၁၁ ခုနှစ်၊ မတ်လတွင် ပေါ်ပေါက်လာသည့် ဒီမိုကရေစီ အစိုးရလက်ထက်၌နှစ်နိုင်ငံပူးပေါင်းဆောင်ရွက်မှုများ သိသိသာသာ တိုးမြှင့်ဆောင်ရွက်နိုင်ခဲ့သည်ကို ကြိုဆို ကြောင်းနှင့် ယင်းသို့ ပူးပေါင်းဆောင်ရွက်မှု များကို ပိုမိုအဆင့်မြှင့်တင်သွားလိုသည့်ဆန္ဒကို ထုတ်ဖော် ခဲ့ကြသည်။ အိန္ဒိယနိုင်ငံသို့ ၂၀၁၂ ခုနှစ်၊ ဇန်နဝါရီလအတွင်း သွားရောက်ခဲ့သော မြန်မာနိုင်ငံ၊ နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီး ဦးဝဏ္ဏမောင်လွင် နှင့် ၂၀၁၂ ခုနှစ်၊ ဖေဖော်ဝါရီလအတွင်းက သွားရောက်ခဲ့သော ဆောက်လုပ်ရေး ဝန်ကြီးဌာန၊ ပြည်ထောင်စုဝန်ကြီး ဦးခင်မောင်မြင့် တို့၏ခရီးစဉ် နှင့် ၂၀၁၂ ခုနှစ်၊ ဖေဖော်ဝါရီလအတွင်းက မြန်မာနိုင်ငံသို့ လာရောက်ခဲ့သော အိန္ဒိယနိုင်ငံ ရေအရင်းအမြစ်နှင့် လွှတ်တော်ဆိုင်ရာဝန်ကြီး မစ္စတာ ပီ ကေ ဘန်ဆဲလ် ၏ ခရီးစဉ် စသည့် နှစ်နိုင်ငံ အပြန်အလှန် ခရီးစဉ်များ၏ အောင်မြင်မှုကို နှစ်ဘက်ခေါင်းဆောင်များက ကျေနပ်အားရမှု ရှိကြောင်း ထုတ်ဖော် ပြောကြားခဲ့ကြသည်။ နှစ်ဘက်စလုံးမှ နှစ်နိုင်ငံ အဆင်မြင့်ခေါင်းဆောင်များ၏ အပြန်အလှန်ခရီးစဉ်များကို ဆက်လက် အကောင်အထည်ဖော်သွားရန် သဘောတူညီခဲ့ကြ သည်။
၁၃။      နှစ်နိုင်ငံခေါင်းဆောင်များသည် အကြမ်းဖက်မှုများနှင့် သောင်းကျန်းသူအဖွဲ့များ၏ လှုပ်ရှားမှု အသွင်သဏ္ဍာန် မျိုးစုံကို တိုက်ဖျက်သွားရန် ဆန္ဒရှိကြောင်း ထပ်လောင်း အတည်ပြုပြောကြားခဲ့သည်။ ဖွံ့ဖြိုးတိုးတက်ရေးတွင် အရေးပါသည့် နယ်စပ်ဒေသ တည်ငြိမ် အေးချမ်းရေး နှင့် လုံခြုံရေးရှိစေရန်အတွက် လုံခြုံရေးတပ်ဖွဲ့များ နှင့် နယ်ခြားစောင့် တပ်ဖွဲ့များ အကြား  ပိုမိုပူးပေါင်းဆောင်ရွက်သွားရန် လိုအပ်ကြောင်း နှစ်နိုင်ငံခေါင်းဆောင်များက အလေးထား‌ ပြောကြားခဲ့သည်။ ယင်းကိစ္စနှင့်စပ်လျဉ်း၍ နှစ်နိုင်ငံအကြား နယ်စပ်ဒေသ စီမံခန့်ခွဲမှုကို ပိုမိုထိရောက်စွာ ဆောင်ရွက်နိုင်ရေးအတွက် ရည်ရွယ်လျက် နှစ်နိုင်ငံ နယ်စပ်ဒေသ ကော်မတီ၏ ပထမအကြိမ် အစည်းအဝေး အောင်မြင်စွာ ကျင်းပနိုင်ခဲ့ခြင်းအပေါ် ကြိုဆိုခဲ့ကြသည်။ နှစ်နိုင်ငံ ခေါင်းဆောင်များသည် နှစ်နိုင်ငံ၏ သက်ဆိုင်ရာနယ်နိမိတ်များကို အကြမ်းဖက်သမားများ၊ သောင်းကျန်းသူ အဖွဲ့အစည်းများ နှင့် ၄င်းတို့နှင့်ဆက်နွယ်သူများမှ လေ့ကျင့်ခြင်း၊ လွတ်မြောက်ရာနေရာ အဖြစ် ခိုအောင်းနေထိုင်ခြင်း၊ အခြားလှုပ်ရှားမှုများ ဆောင်ရွက်ခြင်းကို ခွင့်ပြုသွားမည် မဟုတ်ကြောင်း ထပ်လောင်းပြောကြားခဲ့သည်။
၁၄။      နှစ်နိုင်ငံခေါင်းဆောင်များက နယ်စပ်ဒေသများကို ကောင်းမွန်စွာ စီမံခန့်ခွဲခြင်းသည် နယ်စပ်ဒေသ လုံခြုံရေး ထိန်းသိမ်းရာတွင် အရေးပါကြောင်း ပြောကြားခဲ့ကြသည်။ ယင်း ကိစ္စနှင့်စပ်လျဉ်း၍ နှစ်နိုင်ငံ သက်ဆိုင်ရာ မြေတိုင်းဦးစီးဌာနများ အနေဖြင့် နယ်နိမိတ် ကျောက်တိုင်များကို စနစ်တကျ စစ်ဆေး ထိန်းသိမ်းသွားရန် လိုအပ်ကြောင်း ညွှန်ကြားခဲ့ကြသည်။ သက်ဆိုင်ရာ မြေတိုင်းဦးစီးဌာန အကြီးအကဲများ အနေဖြင့် (၁၇) ကြိမ်မြောက် နယ်စပ်နယ်ဘက် အာဏာပိုင်များ၏ နိုင်ငံတော်အဆင့်အစည်းအဝေးတွင် ပူးတွဲဖော်ထုတ်ခဲ့သည့် နေရာများ၌ နှစ်နိုင်ငံ ပူးတွဲစစ်ဆေးရန်နေ့ရက်ကို ဆောလျင်စွာ အတည်ပြုသွားရန် နှစ်နိုင်ငံ ခေါင်းဆောင် များက ညွှန်ကြားခဲ့သည်။
ပေါင်းစည်းဆက်သွယ်မှု

၁၅။      နှစ်နိုင်ငံ ပြည်သူများအကြား ကုန်သွယ်ရေး၊ ယဉ်ကျေးမှု၊ ကမ္ဘာလှည့်ခရီးသွား လုပ်ငန်း အပါအဝင် အခြားသော အပြန်အလှန် သွားလာမှုများ တိုးမြှင့်နိုင်စေရန်အတွက် နှစ်နိုင်ငံ အကြား ထိတွေ့ဆက်ဆံမှု တိုးမြှင့်ရေးသည် အရေးပါကြောင်း နှစ်နိုင်ငံခေါင်းဆောင်များက အလေးထား ပြောကြားခဲ့ကြသည်။ ထို့ပြင် ကုလားတန်မြစ်ကြောင်း ဘက်စုံသယ်ယူပို့ဆောင်ရေး စီမံကိန်းနှင့် ပတ်သက်၍ ပုံမှန်ဖြစ်ပေါ် တိုးတက်မှုများအပေါ် ကျေနပ်အားရမှုရှိကြောင်း ထုတ်ဖော် ပြောကြားခဲ့သည်။ ၂၀၁၂ ခုနှစ်၊ ဧပြီလတွင် မြန်မာ-အိန္ဒိယ နှစ်ဘက်ကိုယ်စားလှယ်အဖွဲ့များ ပူးတွဲ ကွင်းဆင်းစစ်ဆေးမှုပြုလုပ်ပြီးနောက် ဇော်ရင်ပူရီ (မီဇိုရမ်) ၌ အကောက်ခွန်စခန်း ဖွင့်လှစ်ရန် နေရာ သတ်မှတ်ရေးကိစ္စကို အပြီးသတ် ဆောင်ရွက်နိုင်ခဲ့ခြင်းအပေါ် ကြိုဆိုခဲ့ကြသည်။ ၂၀၁၆ ခုနှစ်တွင် ဆောင်ရွက်ပြီးစီးရန် ရည်မှန်းထားသည့် အဆိုပါစီမံကိန်းသည် နှစ်နိုင်ငံ ကုန်သွယ်ရေး နှင့် ပြည်သူများအချင်းချင်း ထိတွေ့ဆက်ဆံရေးတို့ကို တိုးမြှင့်နိုင်မည့်အပြင် ကုန်းတွင်းပိတ်ဒေသ ဖြစ်သည့် အိန္ဒိယ အရှေ့မြောက်ဒေသရှိ ပြည်သူများ၏ ဘဝဖွံ့ဖြိုးတိုးတက်ရေးကိုလည်း အထောက်အကူ ပြုနိုင်မည်ဖြစ်ကြောင်း မှတ်သားခဲ့ကြသည်။
၁၆။      အိန္ဒိယဝန်ကြီးချုပ်မှ တမူး-ကလေးဝ ချစ်ကြည်ရေးကားလမ်းပေါ်ရှိ တံတား (၇၁)စင်း အားပြုပြင်၊ အဆင့်မြှင့်တင်မှုလုပ်ငန်းများကို တာဝန်ယူဆောင်ရွက်ပေးမည်ဖြစ်ကြောင်း ကြေညာခဲ့သည်။ အိန္ဒိယနိုင်ငံမှ ကလေးဝ-ယာကြီး လမ်းပိုင်းကိုလည်းကောင်း၊ မြန်မာနိုင်ငံမှ ယာကြီး-မုံရွာ လမ်းပိုင်းကိုလည်းကောင်း လာမည့် ၂၀၁၆ ခုနှစ် မတိုင်မီ အဝေးပြေးလမ်းမကြီး အဆင့်သို့ တိုးမြှင့်ဆောင်ရွက်ရန် နှစ်နိုင်ငံခေါင်းဆောင်များက ဆုံးဖြတ်ခဲ့ကြသည်။ အဆိုပါ စီမံကိန်းသည် မြန်မာနိုင်ငံကိုဖြတ်၍ အိန္ဒိယနိုင်ငံ၊ မိုရေး မှ ထိုင်းနိုင်ငံ၊ မဲဆောက်သို့ ဆက်သွယ်မည့် (၃) နိုင်ငံ လမ်းဖောက်လုပ်မှုကို အထောက်အကူပြုနိုင်မည်ဟု မှတ်ယူသည့်အတွက် နှစ်နိုင်ငံ ခေါင်းဆောင်များသည် မြန်မာ-အိန္ဒိယ-ထိုင်း (၃)နိုင်ငံ အဝေးပြေးလမ်း ဖောက်လုပ်ရေးဆိုင်ရာ ပူးတွဲလုပ်ငန်းအဖွဲ့၏ လုပ်ငန်းများ ပြန်လည်ဆောင်ရွက်နေမှုအပေါ် ကြိုဆိုခဲ့ကြသည်။ သုံးနိုင်ငံ ထိတွေ့ ဆက်ဆံမှုကို လာမည့် ၂၀၁၆ ခုနှစ် မတိုင်မီ စတင်နိုင်ရေးအတွက် တပြိုင်တည်း ပူးပေါင်း ကြိုးပမ်းဆောင်ရွက်သွားရန် သဘောတူညီခဲ့ကြသည်။
၁၇။      နှစ်နိုင်ငံဆက်ဆံရေးတွင် ပြည်သူများအချင်းချင်း ထိတွေ့ဆက်ဆံမှုသည် အရေးပါ သည့်အလျောက် အိန္ဒိယနိုင်ငံ၊ အင်ဖာမြို့ နှင့် မြန်မာနိုင်ငံ၊ မန္တလေးမြို့ တို့အကြား ဘတ်စ်ကားလိုင်း ပြေးဆွဲရန် နှစ်ဘက် သဘောတူညီခဲ့ကြသည်။ လုပ်ငန်း ဆောလျင်စွာ စတင်လည်ပတ် နိုင်စေရေးအတွက် နှစ်ဘက်စလုံး၏ သက်ဆိုင်ရာတာဝန်ရှိသူများ အနေဖြင့် လုပ်ဆောင်ဖွယ်ရာများကို အပြီးသတ်ဆောင်ရွက်ရန် နှစ်နိုင်ငံ ခေါင်းဆောင်များမှ ညွှန်ကြားခဲ့သည်။
၁၈။      တိုက်ရိုက်လေကြောင်း ဆက်သွယ်မှုကို တိုးမြှင့်စေနိုင်ပြီး၊ စီးပွားရေး ပူးပေါင်း ဆောင်ရွက်မှု၊ ခရီးသွားလုပ်ငန်း နှင့် ပြည်သူများ အချင်းချင်း အပြန်အလှန် သွားလာလည်ပတ်မှု များကို  အဆင်ပြေချောမွေ့ လွယ်ကူစေမည့် နှစ်နိုင်ငံအကြား လေကြောင်းဝန်ဆောင်မှုဆိုင်ရာ သဘောတူညီမှု စာချုပ်သစ် လက်မှတ် ရေးထိုးနိုင်ခဲ့ခြင်းကို နှစ်နိုင်ငံခေါင်းဆောင်များက ကြိုဆိုခဲ့ ကြသည်။
၁၉။      နှစ်နိုင်ငံခေါင်းဆောင်များသည် နှစ်နိုင်ငံအကြား နယ်စပ်ဖြတ်ကျော် ရထားလမ်း အဆက်အသွယ် ထူထောင်ရေးဆိုင်ရာ နည်းပညာ နှင့် ကုန်သွယ်မှု ဖြစ်နိုင်ခြေအလားအလာများ နှင့် တိုက်ရိုက်ရေကြောင်း အဆက်အသွယ် ထူထောင်ရေးဆိုင်ရာ ကုန်သွယ်မှု ဖြစ်နိုင်ခြေအလားအလာများကို စဉ်းစား ဆုံးဖြတ်နိုင်ရန် အတွက် ပူးတွဲလုပ်ငန်းအဖွဲ့ တစ်ရပ်ကို ဖွဲ့စည်းတည်ထောင် သွားရန် ဆုံးဖြတ်ခဲ့ကြသည်။
၂၀။      မြန်မာနိုင်ငံတွင် အကောင်အထည်ဖော် ဆောင်ရွက်လျက်ရှိသည့် ထားဝယ်ရေနက် ဆိပ်ကမ်းစီမံကိန်း ကဲ့သို့သော အရေးပါသည့် အခြေခံအဆောက်အအုံ စီမံကိန်းများ ဖွံ့ဖြိုး တိုးတက်ရေးတွင် အိန္ဒိယနိုင်ငံမှ ပါဝင်ဆောင်ရွက်နိုင်မည့် အလားအလာကိုလည်း နှစ်ဘက် ဆွေးနွေးခဲ့ကြသည်။

ဖွံ့ဖြိုးတိုးတက်ရေး ပူးပေါင်းဆောင်ရွက်မှု

၂၁။      နှစ်နိုင်ငံခေါင်းဆောင်များက နှစ်နိုင်ငံအကြား ဖွံ့ဖြိုးရေးဆိုင်ရာ ပူးပေါင်း ဆောင်ရွက်မှုများ တိုးတက် လာသည့်အလျောက် အိန္ဒိယနိုင်ငံမှ မြန်မာနိုင်ငံသို့ ယနေ့အချိန်အထိ ထောက်ပံငွေ နှင့် အတိုးနှုန်း သက်သာသော ချေးငွေ စုစုပေါင်း အမေရိကန်ဒေါ်လာ (၁.၂) ဘီလီယံ ပေးအပ်နိုင်ခဲ့ခြင်းအပေါ် အားရကျေနပ်မှုရှိကြောင်း ထုတ်ဖော်ပြောကြားခဲ့သည်။ မြန်မာနိုင်ငံတွင် လက်ရှိဆောင်ရွက်လျက်ရှိသည့် အခြေခံအဆောက်အအုံ၊ စိုက်ပျိုးရေး၊ လူ့စွမ်းအား အရင်းအမြစ် နှင့် စက်မှု ဖွံ့ဖြိုးတိုးတက်ရေး၊ လျှပ်စစ်စွမ်းအား နှင့် ကျန်းမာရေးကဏ္ဍ များအပြင် မြန်မာပြည်သူများအတွက် အနာဂတ်ကာလတွင် အကျိုးဖြစ်ထွန်းမည့် စီမံကိန်းများကို ရှာဖွေဖော်ထုတ်သွားရန် နှစ်နိုင်ငံခေါင်းဆောင်များက သဘောတူညီခဲ့ကြသည်။
၂၂။       နှစ်နိုင်ငံခေါင်းဆောင်များသည် အိန္ဒိယအစိုးရမှ မြန်မာအစိုးရသို့ ပေးအပ်မည့် သက်သာသောချေးငွေ အမေရိကန်ဒေါ်လာ သန်း (၅၀၀) နှင့်ပတ်သက်သည့် နားလည်မှု စာချွန်လွှာ လက်မှတ်ရေးထိုးနိုင်ခဲ့ခြင်းကို ကြိုဆိုခဲ့ကြသည်။ အဆိုပါ သက်သာသောချေးငွေများကို မြန်မာနိုင်ငံ၏ လယ်ယာစိုက်ပျိုးရေးနှင့်ဆည်မြောင်း၊ ရထားပို့ဆောင်ရေး နှင့် လျှပ်စစ်စွမ်းအား စသည့်ကဏ္ဍများရှိ အခြေခံအဆောက်အအုံ ဖွံ့ဖြိုးတိုးတက်ရေး စီမံကိန်းလုပ်ငန်းများတွင် အသုံးပြုသွားမည်ဖြစ်သည်။
၂၃။      နယ်စပ်ဒေသများတွင် နေထိုင်ကြသည့် ပြည်သူများ၏ ဖွံ့ဖြိုးတိုးတက်ရေး နှင့် သာယာဝပြောရေးကို အလေးထားဆောင်ရွက်ရန် လိုအပ်သည့်အလျောက်၊  အဆိုပါ﷿N][gမ်းများ အဆင့်မြှင့်တင်ခြင်း၊  ‌ေကျာင်းများ၊ ကျန်းမာရေးဌာနများ၊ တံတားများ တည်ဆောက်ခြင်း၊ လယ်ယာစိုက်ပျိုးရေးနှင့် ဆက်စပ်သင်တန်းများ ဖွင့်လှစ်ခြင်း အပါအဝင် အခြေခံ အဆောက်အအုံ ဖွံ့ဖြိုးတိုးတက်ရေး နှင့် အသေးစား စီးပွားရေးလုပ်ငန်းများ ဆောင်ရွက်ပေးခြင်းဖြင့် နယ်စပ်ဒေသများ၏ လူမှုစီးပွားဖွံ့ဖြိုးတိုးတက်မှုကို  ဖော်ဆောင်နိုင်မည် ဖြစ်သည့် အတွက် ပူးပေါင်းဆောင်ရွက်သွားရန်  နှစ်နိုင်ငံခေါင်းဆောင်များက သဘောတူညီ ခဲ့သည်။ နာဂ ကိုယ်ပိုင်အုပ်ချုပ်ခွင့်ရဒေသ၌ ဖာလာစေ့ အမြောက်အမြား စိုက်ပျိုးထုတ်လုပ်နိုင်ရေးအတွက် အိန္ဒိယနိုင်ငံမှ အကူအညီပေးရန် ကမ်းလှမ်းခြင်းကို ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတက ကြိုဆိုခဲ့သည်။
၂၄။      သိပ္ပံနှင့်နည်းပညာကဏ္ဍတွင် ပူးပေါင်းဆောင်ရွက်မှုကို တိုးမြှင့်ဆောင်ရွက်သွားကြရန် နှစ်နိုင်ငံ ခေါင်းဆောင်များမှ ဆန္ဒထုတ်ဖော်ခဲ့ကြပြီး၊ ၂၀၁၂ ခုနှစ် ဧပြီလ (၃) ရက်နေ့တွင် မြန်မာ-အိန္ဒိယ သိပ္ပံနှင့် နည်းပညာဆိုင်ရာ ပူးတွဲလုပ်ငန်းအဖွဲ့၏ ပထမအကြိမ် အစည်းအဝေး ကျင်းပနိုင်ခဲ့ခြင်းအပေါ် ဝမ်းမြောက်စွာ မှတ်သားခဲ့သည်။ အဆိုပါပူးတွဲလုပ်ငန်းအဖွဲ့မှ အနာဂတ်၌ ပူးပေါင်းဆောင်ရွက်နိုင်ရေးအတွက် စိုက်ပျိုးရေး ဇီဝနည်းပညာ၊ ရိတ်သိမ်းနည်းပညာ၊ ဆေးဝါးဆိုင်ရာဇီဝနည်းပညာ၊ ဆေးသုတေသနနှင့် ပြန်လည်ပြည့်ဖြိုးမြဲ စွမ်းအင်ကဏ္ဍများရှိ ဦးစားပေး နယ်ပယ်များကို ဖော်ထုတ်ခဲ့ပါသည်။ နှစ်နိုင်ငံခေါင်းဆောင်များသည် ပူးတွဲလုပ်ငန်းအဖွဲ့၏ ဆုံးဖြတ်ချက်များကို ကြိုဆိုခဲ့ကြပြီး၊ မြန်မာနိုင်ငံအနေဖြင့် ဦးစားပေးစီမံကိန်းများအနက်မှ အချို့ကို အကောင်အထည်ဖော်နိုင်ရေးအတွက် တိကျသည့်အဆိုပြုလွှာများ ပြုစုသွားရန် သဘောတူညီခဲ့ ကြသည်။
၂၅။        ခရီးစဉ်အတွင်း လက်မှတ်ရေးထိုးခဲ့သည့် နားလည်မှုစာချွန်လွှာအရ နှစ်နိုင်ငံ ခေါင်းဆောင်များသည် အိန္ဒိယ၏ ငွေကြေးနှင့်နည်းပညာ အကူအညီဖြင့် မြန်မာနိုင်ငံ သတင်း အချက်အလက် နှင့် နည်းပညာဌာန တည်ထောင်ရန် ဆုံးဖြတ်ခဲ့သည်။ အိန္ဒိယဝန်ကြီးချုပ်မှ ရန်ကုန်မြို့ရှိ သတင်းအချက်အလက်နှင့်နည်းပညာ မြင့်မားရေးဆိုင်ရာ မြန်မာ-အိန္ဒိယစင်တာအား လာမည့် (၅)နှစ်တာ ကာလအတွက် နည်းပညာနှင့်ငွေကြေး အထောက်အပံ့များ ဆက်လက် ပေးအပ်သွားမည် ဖြစ်သည့်အပြင်၊ နည်းပညာဆိုင်ရာ အဆင့်မြှင့်တင်မှုကိုလည်း ဆောင်ရွက်ပေး သွားမည် ဖြစ်ကြောင်း ကြေညာခဲ့သည်။ မြန်မာသုတေသီများအနေဖြင့် အိန္ဒိယတက္ကသိုလ်များနှင့် သုတေသနအဖွဲ့အစည်းများ၌ သုတေသနလုပ်ငန်းများ ဆောင်ရွက်နိုင်စေရန် နှစ်စဉ် ပညာသင်ဆု (၁၀) ဆု ပေးအပ်သွားမည်ဖြစ်ကြောင်း အိန္ဒိယဝန်ကြီးချုပ်မှ ကြေညာခဲ့သည်။ အဆိုပါ ပညာသင်ဆုများကို ကမ္ဘာ့လေထုနှင့်ကမ္ဘာမြေကြီးဆိုင်ရာသိပ္ပံ၊ ဓါတုသိပ္ပံ၊ အင်ဂျင်နီယာသိပ္ပံ၊ ဇီဝသိပ္ပံ၊ ဆေး သိပ္ပံ၊ သင်္ချာနှင့်တွက်ချက်ရေးဆိုင်ရာသိပ္ပံ၊ ရူပသိပ္ပံ နယ်ပယ်များတွင် ပေးအပ်သွားမည်ဖြစ်ပြီး၊ သင်တန်းကာလ လေးလမှ ခြောက်လ အထိ ကြာမြင့်မည်ဖြစ်သည်။
၂၆။      မြန်မာနိုင်ငံ၏ လူစွမ်းအားအရင်းအမြစ် ဖွံ့ဖြိုးတိုးတက်စေရေးအတွက် အိန္ဒိယမှ ကူညီပေးလိုသည့် ဆန္ဒနှင့်အညီ အိန္ဒိယ စီးပွားရေးနှင့်နည်းပညာ ပူးပေါင်းဆောင်ရွက်ရေး အစီအစဉ် အပါအဝင် မြန်မာနိုင်ငံသို့ လက်ရှိ သင်တန်းသားဦးရေ (၂၅၀) ဦး ခွဲဝေပေးအပ် နေခြင်းအား နှစ်ဆတိုး၍၊ သင်တန်းသားဦးရေ (၅၀၀) ဦး သို့ တိုးမြှင့်ပေးအပ်သွားမည် ဖြစ်ကြောင်း အိန္ဒိယဝန်ကြီးချုပ်မှ ကြေညာခဲ့သည်။ ပြည်ထောင်စုသမ္မတ မြန်မာနိုင်ငံတော်၊ နိုင်ငံတော်သမ္မတမှ ဤအစီအစဉ်အား ကြိုဆိုခဲ့သည်။
၂၇။      မြန်မာသံတမန်များကို အစည်းအဝေး စီမံခန့်ခွဲမှုဆိုင်ရာ သင်တန်းများ ပေးအပ်ရန် ကမ်းလှမ်းခြင်း၊ နိုင်ငံခြားရေးဝန်ကြီးဌာန၊ နေပြည်တော် နှင့် ရန်ကုန်မြို့၌ ဘာသာစကား သင်ကြားရေးအခန်းများ၊ အစည်းအဝေးခန်းမများ နှင့် ဆက်စပ်ပစ္စည်းများ တပ်ဆင်တည်ထောင် ပေးရန် နှင့် နိုင်ငံခြားရေးဝန်ကြီးဌာန၊ နေပြည်တော်၌ အင်တာနက် သုတေသနဌာန တည်ထောင် နိုင်ရေး အိန္ဒိယဘက်မှ ကူညီပံ့ပိုးပေးခြင်းများအတွက် ပြည်ထောင်စုသမ္မတမြန်မာနိုင်ငံတော်၊ နိုင်ငံတော်သမ္မတက ကျေးဇူးတင်ရှိကြောင်း ပြောကြားခဲ့သည်။
၂၈။       လယ်ယာစိုက်ပျိုးရေးကဏ္ဍ၌ ပူးပေါင်းဆောင်ရွက်မှု မြှင့်တင်ရန် ဆန္ဒရှိကြောင်း နှစ်ဘက် စလုံးမှ ထုတ်ဖော်ပြောကြားခဲ့သည်။ အိန္ဒိယ၏ ထောက်ပံ့ငွေ အမေရိကန်ဒေါ်လာ (၁၀) သန်းဖြင့် လယ်ယာသုံးစက်ကိရိယာပစ္စည်းများအား မြန်မာဘက်သို့ လက်ဆောင်အဖြစ် ပေးအပ်ခဲ့ခြင်းအတွက် နိုင်ငံတော်သမ္မတမှ အိန္ဒိယအစိုးရအား ကျေးဇူးတင်ရှိကြောင်း နှင့် ယင်းစက်ပစ္စည်း များကို မြန်မာနိုင်ငံ ဒေသအသီးသီးသို့ ဖြန့်ဖြူးပြီး ဖြစ်ကြောင်း နှင့် တောင်သူလယ်သမားများ၏ အကျိုးစီးပွားအတွက် အသုံးပြုလျက်ရှိကြောင်း ပြောကြားခဲ့သည်။ ခရီးစဉ်အတွင်း လက်မှတ်ရေးထိုးခဲ့သည့်  နားလည်မှုစာချွန်လွှာအရ စိုက်ပျိုးရေးသုတေသနနှင့် ပညာရေးအဆင့်မြင့်ဌာနအား ရိုးရာ‌ဗဟုသုတ နှင့် ပတ်ဝန်းကျင်ထိန်းသိမ်းရေး အပါအဝင် ခေတ်မီနောက်ဆုံးပေါ် နည်းပညာများ အသုံးပြုသည့် (Centre for Excellence) အဖြစ် အိန္ဒိယ၏ ငွေကြေး နှင့် နည်းပညာ အကူအညီဖြင့် တည်ထောင်သွားရေး နှစ်နိုင်ငံခေါင်းဆောင်များမှ ဆုံးဖြတ်ခဲ့ကြသည်။ နေပြည်တော် ရေဆင်းရှိ စိုက်ပျိုးရေးသုတေသနဦးစီးဌာန၌ ခေတ်မီပညာပေး စပါးဇီဝဥယျာဉ် တည်ထောင်သွားရန် နှစ်နိုင်ငံခေါင်းဆောင်များက သဘောတူညီခဲ့သည်။ ယင်း ဌာန(၂)ခုသည် မြန်မာ့လယ်ယာကဏ္ဍ၊ ပညာရေး နှင့် စီးပွားရေး အသိုင်းအဝန်းအတွင်း နည်းပညာ နှင့် သုတေသနဆိုင်ရာ အကူအညီများ ပေးအပ်နိုင်မည် ဖြစ်သည်။ ထို့ပြင် နေပြည်တော်ရှိ စံပြစိုက်ခင်းအတွင်း ဆိုင်ကလုန်းမုန်တိုင်းဒဏ် ခံနိုင်သည့် ခေတ်မီစပါးကျီတစ်ခု တည်ဆောက်ရန် အိန္ဒိယနိုင်ငံမှ ပံ့ပိုးကူညီမှုပေးသည့်အတွက် နိုင်ငံတော်သမ္မတမှ အိန္ဒိယဝန်ကြီးချုပ်အား ကျေးဇူးတင်ရှိကြောင်း  ပြောကြားခဲ့သည်။
၂၉။      မြန်မာဘက်မှ နို့နှင့်နို့ထွက်ပစ္စည်း ထုတ်လုပ်ရေးလုပ်ငန်း၊ နို့စားနွား မွေးမြူရေး လုပ်ငန်း  ဖွံ့ဖြိုးတိုးတက်ရေး နှင့် ကာကွယ်ဆေး ထုတ်လုပ်ရေး နည်းပညာဆိုင်ရာ သင်တန်းများ/ ပညာသင်ဆုများ အိန္ဒိယဘက်မှ ကူညီစီစဉ်ပေးအပ်သွားရန် နှင့် အိန္ဒိယအစိုးရမှ ရှမ်းပြည်နယ်၌ နို့နှင့်နို့ထွက်ပစ္စည်းစက်ရုံ တစ်ရုံ တည်ထောင်ပေးရန် မေတ္တာရပ်ခံခဲ့သည်။ အိန္ဒိယဘက်မှ မြန်မာဘက်၏ အဆိုပြုချက်ကို အလေးထား စဉ်းစားသွားရန် သဘောတူညီခဲ့သည်။
ကုန်သွယ်ရေး နှင့် ရင်းနှီးမြှုပ်နှံမှု

၃၀။      ၂၀၁၅ ခုနှစ်တွင် နှစ်နိုင်ငံကုန်သွယ်မှုကို နှစ်ဆတိုးမြှင့်ရန် နှစ်ဘက်သဘောတူညီ ထားသည့်အလျောက်၊ ကုန်သွယ်ရေး ပိုမိုတိုးမြှင့်ရန် အသုံးမပြုရသေးသည့် အလားအလာကောင်း များစွာ တည်ရှိနေကြောင်း နှစ်နိုင်ငံခေါင်းဆောင်များက အလေးထား ပြောကြားခဲ့ပြီး၊ အဆိုပါအလားအလာကို စီးပွားရေးလုပ်ငန်းရှင်များမှ အသုံးချသွားရန် တိုက်တွန်းခဲ့သည်။ ဆိပ်ကမ်းများ၊ အဝေးပြေးလမ်းမကြီးများ၊ ရေနံနှင့်သဘာဝဓါတ်ငွေ့၊ စိုက်ပျိုးရေး၊ ကုန်ထုတ်လုပ် ရေး၊ ဝန်ဆောင်မှုလုပ်ငန်းများ နှင့် သတင်းအချက်အလက်၊ ဆက်သွယ်ရေး နှင့် နည်းပညာ စသည့် ကဏ္ဍများတွင် အိန္ဒိယကုမ္ပဏီများမှ ရင်းနှီးမြှုပ်နှံမှုများ ပြုလုပ်သွားရေး အထူးအားပေးသွားမည်ဖြစ်သည်။ ယင်းကိစ္စနှင့်စပ်လျဉ်း၍ နှစ်နိုင်ငံခေါင်းဆောင်များက တိကျမှန်ကန်သည့် သတင်း အချက်အလက် နှင့် အကြံဉာဏ်များ အချိန်နှင့်တပြေးညီ ဖလှယ်စေနိုင်မည့် နှစ်နိုင်ငံအကြား အသစ်ဖွဲ့စည်း တည်ထောင်ခဲ့သည့် ကုန်သွယ်ရေးနှင့်ရင်းနှီးမြှုပ်နှံမှုဖိုရမ်၏ အရေးပါမှုကို အလေးထား ပြောကြားခဲ့သည်။
၃၁။      နှစ်နိုင်ငံခေါင်းဆောင်များသည် နှစ်နိုင်ငံကုန်သွယ်ရေး ပူးပေါင်းဆောင်ရွက်မှုတွင် ရင်ဆိုင်တွေ့ကြုံရမည့် အတားအဆီး အခက်အခဲများကို ဖော်ထုတ်ဖယ်ရှားနိုင်စေရန် နှစ်ဘက် အစိုးရများမှ ကြိုးပမ်းသွားမည် ဖြစ်ကြောင်း ကတိပြုပြောကြားခဲ့သည်။ ယင်းကိစ္စနှင့်စပ်လျဉ်း ၍ ရန်ကုန်မြို့၌ ဖွင့်လှစ်မည့် အိန္ဒိယနိုင်ငံ United Bank ၏ ကိုယ်စားလှယ်ရုံး နှစ်နိုင်ငံအကြား စီးပွားရေးလုပ်ငန်းများကို အကျိုးပြုပြီး ဘဏ်လုပ်ငန်းကိစ္စများကို လွယ်ကူချောမွေ့စေမည့် ပထမခြေလှမ်းအဖြစ် ကြိုဆို ခဲ့ကြပါသည်။ မြန်မာဘက်အနေဖြင့် ဘဏ်လုပ်ငန်း ဆိုင်ရာ အခန်းကဏ္ဍတွင် သက်ဆိုင်ရာ မြန်မာ အစိုးရကိုယ်စားလှယ်များအား အိန္ဒိယနိုင်ငံ မှ ဘဏ်များနှင့် စိုက်ပျိုးရေးဆိုင်ရာ ဘဏ်လုပ်ငန်း များတွင် လေ့ကျင့်သင်တန်းပေး မည့် အဆိုပြုချက်များကို ကြိုဆိုခဲ့သည်။ နှစ်နိုင်ငံအကြား ကုန်သွယ်ရေး တိုးမြှင့်နိုင်ရန် အလားအလာများစွာရှိသည့် အလျောက်၊ မြန်မာ-အိန္ဒိယ နှစ်နိုင်ငံအကြား ငွေကြေးဆိုင်ရာ အစီအစဉ်များ နှင့်ပတ်သက်၍ မြန်မာနိုင်ငံ၊ ဗဟိုဘဏ် နှင့် အိန္ဒိယနိုင်ငံ၊ Reserve Bank တို့အကြား မကြာမီကာလအတွင်း နားလည်မှုစာချွန်လွှာ တစ်ရပ် လက်မှတ်ရေးထိုးသွားရန်  နှစ်ဘက်စလုံးမှ သဘောတူညီခဲ့ကြသည်။ ဆက်လက်၍ အိန္ဒိယနိုင်ငံ၊ Reserve Bank သည် နှစ်ဘက်အကျိုးတူကိစ္စရပ်များတွင် အမြင်ချင်းဖလှယ်နိုင်ရန် ကြားခံဌာနအဖြစ် ဆောင်ရွက်နိုင်ရေးအတွက် မြန်မာနိုင်ငံ၊ ဗဟိုဘဏ် နှင့် နားလည်မှုစာချွန်လွှာ ရေးထိုးသွားမည်ဖြစ်သည်။ အိန္ဒိယနိုင်ငံ (State Bank of India) သို့မဟုတ်  နှစ်ဘက်သဘောတူညီသည့် အခြားဘဏ်များနှင့် ဘဏ်လုပ်ငန်း အတွေ့အကြုံ နှင့် နည်းပညာများ မျှဝေဖလှယ်ရေးအတွက် နှစ်နိုင်ငံခေါင်းဆောင်များက သဘောတူညီခဲ့ကြသည်။
၃၂။      နှစ်နိုင်ငံ ခေါင်းဆောင်များသည် နှစ်ဘက် စီးပွားရေးလုပ်ငန်းရှင်များအား နှစ်နိုင်ငံ အကြား ကျင်းပ ပြုလုပ်သည့် ကုန်စည်ပြပွဲများတွင် တက်ကြွစွာပါဝင် ဆောင်ရွက်သွားကြရန် လက်ရှိကုန်သွယ်ရေးနှင့် ရင်းနှီးမြှုပ်နှံမှုဆိုင်ရာမူဝါဒများနှင့် ပတ်သက်သည့် အချက်အလက်များကို  နှီးနှောဖလှယ်ပွဲများနှင့် စီးပွားရေးဆိုင်ရာ အခမ်းအနားများမှတစ်ဆင့် ဝေမျှသွားကြရန် တိုက်တွန်းခဲ့ကြပါသည်။ ယင်းကိစ္စနှင့် စပ်လျဉ်း၍ ၂၀၁၁ ခုနှစ်၊ နိုဝင်ဘာလတွင် CII နှင့် UMFCCI တို့မှ ကြီးမှူးကျင်းပသည့် ပထမအကြိမ် အိန္ဒိယကုမ္ပဏီများ၏ ပြပွဲများကို နှစ်စဉ် ကျင်းပပြုလုပ်သွားရန် ဆုံးဖြတ်ချက်ကို ကြိုဆိုခဲ့ပါသည်။
၃၃။      နှစ်နိုင်ငံ ခေါင်းဆောင်များသည်  နယ်စပ်ဒေသ အနီးတဝိုက်တွင် နေထိုင်ကြသည့် ဒေသခံပြည်သူများ၏ လိုအပ်ချက်များကို ထည့်သွင်းစဉ်းစားလျက် နယ်စပ်တစ်လျှောက် နယ်စပ် ဈေးများဖွင့်လှစ်ရန်နှင့် ယင်းကိစ္စအတွက် နားလည်မှုစာချွန်လွှာ လက်မှတ်ရေးထိုးရန် ဆုံးဖြတ်ချက်ကို ကြိုဆိုခဲ့ကြသည်။ ထို့အပြင် နှစ်နိုင်ငံခေါင်းဆောင်များသည် နယ်စပ်ကုန်သွယ်မှု စခန်းနေရာများ၌ ဘဏ်လုပ်ငန်းဆိုင်ရာ အခြေခံ အဆောက်အအုံများအား အဆင့်မြှင့်တင်သွားရန် ဆုံးဖြတ်ချက်သည် ယင်းဒေသများတွင် နေထိုင်ကြသည့် ဒေသခံပြည်သူများအကြား ရောင်းဝယ် ဖောက်ကားမှုကို ပိုမိုလွယ်ကူချောမွေ့စေမည် ဖြစ်ကြောင်း မှတ်သား ခဲ့ကြသည်။
၃၄။      နှစ်ဖက်ခေါင်းဆောင်များသည် ယခင်က ချမှတ်ခဲ့သည့် ဆုံးဖြတ်ချက်အတိုင်း တမူး-မိုရေး နှင့် ရိဒ်-ဇော်ခေါသာရှိ စီးပွားရေးလုပ်ငန်းရှင်များနှင့် နယ်စပ်ကုန်သွယ်ရေးအရာရှိ များအကြား ပြုလုပ်သည့် အစည်းအဝေးများကို ပုံမှန်ပြုလုပ်သွားနိုင်ရန် အတွက်နှစ်နိုင်ငံ အကြား နယ်စပ်ကုန်သွယ်ရေး ကော်မတီဖွဲ့စည်း သင့်ကြောင်း ညွှန်ကြားခဲ့ကြသည်။

လျှပ်စစ်စွမ်းအား နှင့် စွမ်းအင်

၃၅။      နှစ်နိုင်ငံအကြား စွမ်းအင်လုံခြုံမှုကဏ္ဍ တိုးမြှင့်နိုင်ရန်အတွက် ပိုမိုနီးကပ်စွာ ပူးပေါင်းဆောင်ရွက်ရန် လိုအပ်ကြောင်း ခေါင်းဆောင်နှစ်ဦးတို့က အလေးထား ပြောကြားခဲ့ကြ သည်။ ယင်းကိစ္စနှင့် စပ်လျဉ်း၍ ထိုသို့ဆောင်ရွက်ရာတွင် မြန်မာနိုင်ငံအစိုးရနှင့် အိန္ဒိယနိုင်ငံမှ ဂျူဘီလင့် စွမ်းအင်ကုမ္ပဏီတို့အကြား Production sharing Contract လက်မှတ်ရေးထိုးရန် ကိစ္စကိုကြိုဆိုခဲ့ကြသည်။ ထို့ပြင် မြန်မာနိုင်ငံတွင် ရင်းနှီးမြှုပ်နှံမှုပြုလုပ်ရန် အလားအလာ ကောင်းများရှိကြောင်း ကမ်းလှမ်းထားသည့် အသင့်တူးဖော်နိုင်မည့် လုပ်ကွက်များအပါအဝင် မြန်မာ့ရေနံနှင့် သဘာဝဓာတ်ငွေ့ကဏ္ဍနှင့် ရေနံစက်မှုကဏ္ဍ၏ မြစ်အောက်ပိုင်း စီမံကိန်းများတွင် အိန္ဒိယနိုင်ငံမှ ကုမ္ပဏီများအား ရင်းနှီးမြှုပ်နှံမှုပြုလုပ်ရန် အားပေး တိုက်တွန်းခဲ့သည်။
၃၆။      မြန်မာနိုင်ငံတော်သမ္မတက ထမံသီနှင့် ရွှေစာရေးရေအားလျှပ်စစ်စီမံကိန်းများနှင့် ပတ်သက်၍ အိန္ဒိယနိုင်ငံမှ စီမံကိန်းအသေးစိတ် အစီရင်ခံစာများပြုစုလျက်ရှိခြင်းအပေါ် ကျေးဇူး တင်ရှိကြောင်း ပြောကြားခဲ့သည်။ ခေါင်းဆောင်နှစ်ဦးတို့က နည်းပညာ၊ စီးပွားရေးနှင့် လူမှု ဝန်းကျင်ကိစ္စရပ်များကို ထည့်သွင်းစဉ်းစားလျက် အစီရင်ခံစာပါ အချက်အလက်များနှင့် အနာဂတ်လုပ်ငန်းစဉ်များကို အပြီးသတ် ဆောင်ရွက်ရန် လမ်းညွှန်မှာကြားခဲ့ပါသည်။

ယဉ်ကျေးမှု နှင့် ပြည်သူများအချင်းချင်း အပြန်အလှန်လည်ပတ်ရေး

၃၇။      နှစ်နိုင်ငံ ခေါင်းဆောင်များသည်  အိန္ဒိယနှင့်မြန်မာ နှစ်နိုင်ငံပြည်သူများအကြား နီးကပ်သည့် ဆက်ဆံရေး တိုးမြှင့် ဆောင်ရွက်ရာ၌ ယဥ်ကျေးမှုကဏ္ဍ၏ အရေးပါမှုကို အလေးထားပြောကြားခဲ့ကြပြီး နှစ်နိုင်ငံအကြား ၂၀၁၂-၂၀၁၅ ခုနှစ်အတွက် ယဉ်ကျေးမှု ဖလှယ်ရေးအစီအစဉ် လက်မှတ်ရေးထိုးရန်ကိစ္စအပေါ် ကျေနပ်အားရမှုရှိကြောင်း ထုတ်ဖော်ခဲ့ကြ သည်။ ယဉ်ကျေးမှုဖလှယ်ရေးအစီအစဉ်အရ အိန္ဒိယနိုင်ငံ၊ အရှေ့မြောက်ပြည်နယ်များနှင့် မြန်မာနိုင်ငံ နယ်စပ်ဒေသများအကြား ယဉ်ကျေးမှုဖလှယ်ရေးကို တိုးမြှင့်စေ နိုင်မည် ဖြစ်ကြောင်း မှတ်သားခဲ့သည်။
၃၈။      ထို့ပြင် အိန္ဒိယယဉ်ကျေးမှု ဆက်ဆံရေးကောင်စီ၊ မြန်မာနိုင်ငံ သာသနာရေး ဝန်ကြီးဌာနနှင့် သီတဂူကမ္ဘာ့ဗုဒ္ဓအဖွဲ့တို့၏ ပူးပေါင်းစီစဉ်မှုဖြင့် ၂၀၁၂ခုနှစ်၊ ဒီဇင်ဘာလတွင် မြန်မာနိုင်ငံ၌ International Conference on Buddhist Heritage ကျင်းပရန် ပြင်ဆင်နေမှုများကိုလည်း ကြိုဆိုခဲ့ကြပါသည်။
၃၉။      ရွှေတိဂုံစေတီတော် ပရဝုဏ်အတွင်း ကိန်းဝပ် အပူဇော်ခံမည့် ဉာဏ်တော် (၁၆)ပေ အမြင့် ရှိ ဓမ္မစကြာမုဒြာ သဲကျောက် ဗုဒ္ဓဆင်းတုတော် တစ်ဆူအား ယခုနှစ်အတွင်း လှူဒါန်းရန် အိန္ဒိယ ဘက်မှ ဆုံးဖြတ်ခဲ့ခြင်းအပေါ် မြန်မာနိုင်ငံက ကျေးဇူးတင်ကြောင်း ပြောကြားခဲ့သည်။ အိန္ဒိယဝန်ကြီးချုပ်က ၄င်း၏ မြန်မာနိုင်ငံ ချစ်ကြည်ရေးခရီးစဉ်အတွင်း ယင်းဆင်းတုတော် နှင့်ပုံစံတူ ဆင်းတုတော်ငယ် တစ်ဆူကို ပူဇော်ခံရန် ပေးအပ်ခဲ့သည်။ မြန်မာပြည်သူများအနေဖြင့် အိန္ဒိယနိုင်ငံသို့ ဘုရားဖူးခရီးစဉ်များ လာရောက်နိုင်ရေးကို စီစဉ်ဆောင်ရွက်ပေးခြင်း အတွက်လည်း မြန်မာနိုင်ငံက အိန္ဒိယနိုင်ငံအား ကျေးဇူးတင်ကြောင်း ပြောကြား ခဲ့သည်။
၄၀။      အိန္ဒိယနိုင်ငံ ရှေးဟောင်းသုတေသန တိုင်းတာရေးအဖွဲ့မှ မြန်မာနိုင်ငံ ပုဂံမြို့ရှိ အာနန္ဒာ ဘုရား ပြုပြင်ထိန်းသိမ်းရေးလုပ်ငန်းများအား လာမည့် (၂)နှစ်အတွင်း ပြီးစီးအောင် ဆောင်ရွက်နေမှုအပေါ် ခေါင်းဆောင်နှစ်ဦးတို့က ကျေနပ်အားရမှုရှိကြောင်း ထုတ်ဖော် ပြောကြားခဲ့ကြသည်။
၄၁။      အိန္ဒိယနိုင်ငံနှင့် မြန်မာနိုင်ငံတို့ရှိ တတ်သိပညာရှင်များ နှင့် ပညာရေး အဖွဲ့အစည်းများအကြား အဆက်အသွယ်များ ဖွဲ့စည်းထူထောင်ခြင်းအပေါ် ခေါင်းဆောင် နှစ်ဦးတို့က ကြိုဆိုခဲ့ကြပြီး နှစ်ဘက် သုတေသီ ပညာရှင်များအား နှစ်နိုင်ငံတွင်ကျင်းပသည့် ပညာရေးဆိုင်ရာ ကိစ္စရပ်များတွင် တက်ကြွစွာ ပါဝင်ဆောင်ရွက်ပြီး အမြင်ချင်း ဖလှယ်ကြရန် တိုက်တွန်းခဲ့ကြသည်။
၄၂။      အိန္ဒိယ၏ နည်းပညာအကူအညီဖြင့် မြန်မာနိုင်ငံ၌ တည်ထောင်မည့်ကျောင်း အတွက် အိန္ဒိယအစိုးရမှ ထောက်ပံ့မှုများ ပေးသွားမည့်ကိစ္စနှင့်စပ်လျဉ်း၍ အိန္ဒိယဝန်ကြီးချုပ်မှ ကြေညာခဲ့ခြင်းအပေါ် ပြည်ထောင်စု သမ္မတမြန်မာနိုင်ငံတော် နိုင်ငံတော်သမ္မတက ကြိုဆိုခဲ့သည်။

ဒေသတွင်း နှင့် နိုင်ငံတကာကဏ္ဍ

၄၃။      နှစ်နိုင်ငံခေါင်းဆောင်များသည် ဒေသတွင်း နှင့် နိုင်ငံတကာရေးရာ အကျိုးတူကိစ္စ ရပ်များအပေါ် ကျယ်ကျယ်ပြန့်ပြန့် ဆွေးနွေးခဲ့သည်။ နှစ်နိုင်ငံ အကျိုးရှိမည့် နိုင်ငံတကာရေးရာ ကိစ္စရပ်များတွင်လည်း ဆက်လက်ပူးပေါင်း ဆောင်ရွက်သွားရန် သဘောတူညီခဲ့ကြသည်။
၄၄။      ဒေသတွင်း ပူးပေါင်းဆောင်ရွက်ရေးတွင် နှစ်နိုင်ငံ နီးကပ်စွာ ပူးပေါင်းဆောင်ရွက် သွားရန် အရေးကြီး ကြောင်း နှစ်နိုင်ငံခေါင်းဆောင်များက အလေးထား ပြောကြားခဲ့သည်။ အိန္ဒိယ ဝန်ကြီးချုပ်မှ မြန်မာနိုင်ငံ အနေဖြင့် ဘင်းမ်စတက်အဖွဲ့၏ ဥက္ကဌတာဝန်ကို အောင်မြင်စွာ ထမ်းဆောင်သွားနိုင်စေရန် ဆုမွန်ကောင်း တောင်းခဲ့ပြီး၊ အိန္ဒိယနိုင်ငံအနေဖြင့် လာမည့် ဘင်းမ်စတက် ထိပ်သီးညီလာခံကို အိမ်ရှင်အဖြစ် လက်ခံကျင်းပ သွားလိုကြောင်း အဆိုပြုခဲ့သည်။ မြန်မာနိုင်ငံမှ အာဆီယံဥက္ကဌ တာဝန်ထမ်းဆောင်မည့် ၂၀၁၄ ခုနှစ်၌ အာဆီယံ-အိန္ဒိယ ပူးပေါင်း ဆောင်ရွက်ရေးကို ပိုမိုတိုးမြှင့်နိုင်ရန် နှစ်နိုင်ငံခေါင်းဆောင်များက မျှော်လင့်ခဲ့ကြသည်။ မြန်မာနိုင်ငံသည် အာဆီယံ ပေါင်းစည်းရေးအစီအစဉ် (Initiative for ASEAN Integration (IAI) အောက်မှ အာဆီယံနိုင်ငံများနှင့်ပူးပေါင်းဆောင်ရွက်ရေး နှင့် အိန္ဒိယနိုင်ငံ၏  အရှေ့မျှော် မူဝါဒတို့တွင် အရေးပါသော အခန်းကဏ္ဍမှ ပါဝင်ကြောင်း အိန္ဒိယဝန်ကြီးချုပ်မှ ထပ်လောင်း ပြောကြားခဲ့သည်။ နှစ်နိုင်ငံခေါင်းဆောင် များသည် မကြာမီ ကျင်းပသွားမည့် အာဆီယံ-အိန္ဒိယ အထိမ်းအမှတ် ထိပ်သီးအစည်းအဝေးနှင့်ပတ်သက်သည့် လုပ်ဆောင်ဖွယ်ရာများကို နီးကပ်စွာ ပူးပေါင်းဆောင်ရွက်သွားရန် သဘောတူညီခဲ့သည်။

၄၅။      အိန္ဒိယဝန်ကြီးချုပ်မှ ၄င်း နှင့် ကိုယ်စားလှယ်အဖွဲ့ဝင်များ မြန်မာနိုင်ငံသို့ ရောက်ရှိ စဉ်အတွင်း နွေးထွေးလှိုက်လှဲစွာ ဧည့်ဝတ်ကျေပွန်မှုများအတွက် ပြည်ထောင်စုသမ္မတမြန်မာ နိုင်ငံတော်၊ နိုင်ငံတော်သမ္မတ အား ကျေးဇူးတင်ရှိကြောင်း ပြောကြားခဲ့သည်။
၄၆။      အိန္ဒိယနိုင်ငံဝန်ကြီးချုပ်မှ ပြည်ထောင်စုသမ္မတမြန်မာနိုင်ငံတော်၊ နိုင်ငံတော် သမ္မတအား အိန္ဒိယနိုင်ငံသို့ နှစ်ဘက် အဆင်ပြေမည့်နေ့ရက်များတွင် ချစ်ကြည်ရေးခရီး လာရောက်ရန် ဖိတ်ကြားခဲ့သည်။ ခရီးစဉ်နေ့ရက်ကို သံတမန်လမ်းကြောင်းမှတစ်ဆင့် ညှိနှိုင်း သွားမည်ဖြစ်သည်။  ပြည်ထောင်စုသမ္မတမြန်မာနိုင်ငံတော်၊ နိုင်ငံတော်သမ္မတမှ ဖိတ်ကြားချက်ကို လက်ခံခဲ့သည်။

နေပြည်တော်
၂၀၁၂ ခုနှစ်၊ မေလ (၂၈) ရက်။